vendredi 24 février 2012

أفكار

وحشوني و توحشو كلامي و أنا ماني ناسي....قالولي اكتب عبر اشعر أما أنا ماني شاهي ماني لاهي مخي معبي بأفكار أخرى حاجبة علية كلامي  مبعثرة أفكاري وخانقتهم و في دهليز مخبيتهم....أفكار، أفكار ظلمة دحسة ملي تمكنت بيا طفات ضوي و ضيعتني سكتتني خرستني سلبتلي صوتي و معاه حريتي....أفكار ، أفكار نكبتني عبدتني عن أهلي وصحابي بعدتني في طريق بعيد طيشتني وقعدت وحيد لا غطاء يدفيني لا شربة ترويني لا صدر يؤيني....أفكار، أفكار سرابية سعات تظهر جلية و سعات نحسها بعيدة علية هاربة علية  أنا نجري وهي تزيد تبعد علية....أفكار،أفكار حجبتني  في قعر البير رماتني حد ماعاد يسمعني حد ماعاد يلحظني....أفكار، أفكار خوفتني و رهبتني عن الحقيقة بعدتني بسلاسل و أغلام في الظلمة شدتني....أفكار، أفكار ماعادش ساكتلها أفكار بش نحاربها سلاسها نكسرها حيوطها العالية اللي حبستني نهدمها ننبش تراب القبر وين حفرتني ونخرج نخرج نحيا نعيش نتمرغد في الحشيش نشبع بالشمس .....نتبعث من جديد

Aucun commentaire:

Enregistrer un commentaire